أعلن شريف إكرامي، حارس مرمى نادي بيراميدز ومنتخب مصر السابق، اعتزاله كرة القدم، واضعًا حدًا لمسيرة طويلة امتدت لأكثر من 30 عامًا في الملاعب.

وكتب إكرامي، عبر حسابه على منصة “إكس”: “بعد أكتر من 30 سنة، جه الوقت اللي أودع فيه الملعب وأعلق الجوانتي. جه وقت إني أخد قرار يمكن كل لاعب بيبقى عارف إنه هييجي في يوم من الأيام، لكنه عمره ما بيبقى سهل، لأنك مش بتسيب شغلانة.. أنت بتسيب حياة كاملة.”

وأضاف: “شكرًا لكل نادي لعبت فيه. فينورد والجونة، كل واحد فيكم ضاف لي كتير كإنسان، مش بس كلاعب. شكرًا لبيراميدز، النادي اللي ختمت فيه مسيرتي، وكنت محظوظ إني أكون جزءًا من جيل حفر تاريخًا لنفسه وللنادي.”

وتابع: “لكن هيفضل للنادي الأهلي مكانة مختلفة في قلبي. الأهلي مش مجرد نادي لعبت فيه، ده المكان اللي اتولدت فيه، وكبرت واتعلمت ونضجت فيه، ومنه الناس عرفتني، وحققت فيه كل اللي كنت بحلم بيه كلاعب. الأهلي غير أي حد.”

واختتم رسالته قائلًا: “شكرًا لكل مدرب دربني، ولكل لاعب شاركني أوضة اللبس، ولكل عامل وإداري اشتغل في صمت عشان يساعدنا ننجح. شكرًا لكل الجمهور اللي ساندني في الرحلة، وشكرًا لكل اللي انتقدوني، لأنكم كنتوا سببًا في الإنسان اللي بقيت عليه النهارده. عشت معاكم أجمل لحظات في حياتي، وأتعلمت منكم في أصعبها. وشكرًا لعيلتي اللي كانت حاضرة في كل لحظة، واستحملت ضغوط الشغلانة أوقات أكتر مني. من قلبي بقولكم… وبقول للكورة: شكرًا.”

ويُعد شريف إكرامي أحد أبرز حراس المرمى في الكرة المصرية خلال العقدين الأخيرين، إذ بدأ مسيرته مع الأهلي، قبل أن يخوض تجربة احترافية مع فينورد الهولندي، ثم لعب للجونة، قبل أن يعود إلى الأهلي ويحقق معه العديد من البطولات المحلية والقارية، لينتقل بعدها إلى بيراميدز، حيث اختتم مسيرته الكروية. كما مثّل منتخب مصر في العديد من المناسبات الدولية.