تخيل معايا كده انك قاعد بتعمل اي حاجه وليكن بتتفرج على التلفزيون مثلا فجأه لمحت حاجه عدت من عند الباب بسرعه كده فانت هتفكر نفسك بتتخيل وهطنش، بعدها بشويه لقيت نفس الحاجه بردو عدت تانى، قومت تشوف ايه اللي عدى ملقيتش حاجه، هي كانت حاجه انت لمحتها بطرف عينك كده وخلاص ومش عارف هي ايه، بعدها ترجع تفكر تاني ان انت مرهق وتفكيرك مشوش وان انت محتاج تريح شويه بس والموضوع ده هينتهي، بس من جواك هتكون قلقان بردو لان ممكن يكون اللى شوفته ده مش مجرد خيال عادى وان ده ممكن يكون كائن الظل؟!،
ايه هو ياترى كائن الظل ده وايه هي ما هيته؟
بصوا خلونا نكون متفقين الاول ان الموضوع ده بيحصل مع معظمنا بل ممكن يكون كلنا كمان، والظاهره دي متصنفه بانها من اكبر الظواهر الماورائية لانها مرتبطه بعالم الخيال،
اصحاب الظل دول بيتوصفوا بان لونهم اسود جدا وبياخدو شكلهم على هيئة ظل فى شكل بشر، وفي شهود بيقولوا بان معظمهم ذكور وبيلبسوا معاطف وفي اللي قال انهم بيكونوا لابسين قبعات، او ممكن يكونوا واخدين هيئه الاشكال الهندسيه زي مثلث او مربع وهكذا يعني، وفي بعض الاحيان مش بيكون ليهم شكل معروف وبيظهروا بصوره مشوشه بحيث انك متقدرش تحدد لهم شكل معين، وبيظهروا في اي وقت ملهمش وقت معين ممكن بالنهار وممكن بالليل وفي بعضهم بتكون عيونهم حمراء وكبيره.
أصحاب الظلال دول يا سيدي ما تقدرش انك تسجل لهم فيديو او حتى تصورهم صوره لانهم بيتحركوا وبيختفوا بسرعه كبيره جدا مجرد ما بتشوفهم يعني اول ما بتلمحهم بعينك كده بيتلاشوا تماما.
وحسب شهادات الناس اللي شافوا اصحاب الظل دول قالوا انهم ممكن يكونوا في البيوت او في الغابات يعني ملهمش مكان معين وانهم كائنات مش مؤذيه على الرغم من ان في ناس قالت انهم لما كانوا بيشوفوهم كانوا بيحسوا باختناق شديد، واللي قال انه كان بيصحى بالليل يلاقيه جنبه وضاغط على صدره ومش قادر يتنفس يعني اشبه بظاهره الجاثوم كده الى حدا ما.
والتفسيرات اختلفت وتنوعت حوالين اصحاب الظل دول
الاعتقاد الاول بأنهم جن واشباح …
في بعض الناس معتقدين بانهم اشباح وفي ناس ثانيه بتشوف انهم شياطين بسبب الاحاسيس اللي بيحسوها لما بيشوفوهم وناس ثانيه قالت انهم ارواح
وناس ثانيه بيقولوا انهم ممكن يكونوا كائنات روحيه جم للعالم بتاعنا وعندهم فضول انهم يراقبونا ويراقبوا تفاصيل حياتنا كبشر عشان كده بتاخذ شكلنا
والسبب في انهم معتقدين بانهم اشباح لانهم بيعملوا امور شبحيه زي مثلا انهم ممكن يدخلوا في الحيطه او بيظهروا في الاماكن اللي بنقول عليها مسكونه، وكمان ظهورهم بالليل في هيئه زي هيئه الجاثوم.
بس فكروا معايا كده لنفترض مثلا انهم ارواح بشر طيب ليه مهتمين بسلوكنا كبشر ما هما اصلا كانوا بشر ! وكمان اللي شافوهم بيقولوا انهم لونهم اسود جدا على عكس الوصف اللي بتتوصف بيه الاشباح بان لونها ابيض او مايل للرمادي؟!
الاعتقاد التانى انهم كائنات جاية من ابعاد تانية…
معروف في العلم ان 96% من الكون متكون من الماده المظلمه عشان كده احنا مش قادرين اننا نشوف ابعاد ثانيه ،وفى عالم فيزياء اسمه” ستيفن هوكينج” قال:”قد توجد هناك مجرات الظل ،ونجوم الظل وحتى كائنات الظل.”
يعني بمعنى ان ممكن العوالم الثانيه دي تكون موجوده معانا بس من غير ما نحس بيها وممكن تكون ظاهره كائن الظل دي ناتجه من تداخل عالمنا مع الابعاد الثانيه اللي مش بنشوفها دى.
الاعتقاد الثالث بأنهم مسافرين عبر الزمن…
لو كنت شوفت قبل كده اي فيلم او مسلسل خيال علمي ممكن تكون سمعت فيه بان مفيش قانون فيزيائي بيمنعنا من اننا نحقق حلمنا بالسفر عبر الزمن،
وفعلا في محققين في الظواهر الماورائيه قالوا ان كائنات الظل ممكن يكونوا فعلا ضيوف جايين من المستقبل وانهم لما جم كانوا بشكلهم العادي بس لما اندمجوا معانا بداوا ياخذوا شكل الظل على هيئتنا.
مي محمد ✍️✍️✍️