المجرمين والقتلة فى الافلام او فى الواقع عامة بعد كل جريمة بيعملوها ايه اول حاجه بيفكروا يعملوها ياترى؟!
اكيد هى انهم بيحاولو يخفوا آثار الجريمة ويمسحوا الدم اللى على هدومهم او فى مسرح الجريمة، عشان كده ممكن يغسلو آثار الدم بالمياه والصابون اعتقادا منهم بأنهم كده هيخفوا آثار الدم عن المختبرات الجنائية
بس طبعا ومع التطور اللى احنا بنوصله لو كان عند المحققين شك بأن فى آثار دم مخفية
فهما بقوا يقدروا يعرفوا بكل سهولة عن طريق مادة اسمها (اللومينول)
مادة اللومينول دى ياسيدى مادة كيميائية بتدوب ف المياه وفى المحاليل العضوية، وبتتميز بخاصية جميلة اوى وهى انها بتتوهج بلون ازرق لما بتتحط على مادة تانية مؤكسدة مسببة حاجه اسمها (الضيائية الكيميائية) وهي ظهور ضوء من غير مايأثر على حرارة المركب
فى المختبرات بقى واثناء البحث الجنائى بيلجأو لاستخدام المادة دى عشان يكتشفوا اذا كان فى آثار دم موجودة ومخفية ولا لا، وبمجرد ان هما يرشوا المادة دى على المكان اللى كان فيه دم بس اتمسح ويطفوا الانوار فبتتوهج المادة باللون الازرق على مكان الدم بالظبط ويقدروا يعرفوا من خلالها الحقيقة !
مي محمد ✍️✍️✍️