قوانين ماعت

القانون هو الحضارة..
من آلاف السنين أدرك المصريون القدماء إن الحياة ما بتمشيش بشكل عشوائي، وإنها لازم تمشي ضمن قانون.
علشان كده حط المصري القديم نظام “قوانين ماعت”، وهي عبارة عن 42 قانون المفروض الإنسان يلتزم بيهم خلال حياته، ولما يروح فى الحياة الآخرة بيؤكد فى لحظة الحساب إنه التزم بهذه القوانين الأخلاقية فى الدين المصري القديم وعموم الحياة الاجتماعية.
النصوص دي أهميتها إنها بتصور الظلم، وقيم العدل، ويمكن علشان كده كان أول تشبيه فى التاريخ للعدل بالميزان، فى هذه القوانين، شوف المصري القديم كان قانونه اللى بيتلوه متضمن إيه: ” أنا لم أسرق، ولم أقتل رجالا أو نساء أنا لم أتهم أحد زورا”، دي نفس قوانين العقوبات بتاعتنا اللى بتجرم هذه الأفعال وبتعاقب عليها، لكن كمان فوقيها كود أخلاقي وقانون فى معاملة من حولي: “أنا لم أتنصت، لم أغضب بدون سبب، لم استخدم الأفكار أو الكلمات أو الأفعال شريرة”، وكمان قوانين تنظيمية للدولة زي: “أنا لم ألوث مياه النهر، أنا لم أتصرف بالعنف، أنا لم أخرب الممتلكات”.
الحقيقة إننا لو مسكنا قوانين ماعت دي، وحللناها هنلاقيها هي جوهر كل ما جاء بعدها من قوانين وتشريعات، هي القانون فى صورته الأولى والرائعة، كما رآها المصري القديم قبل 7 آلاف سنة.. علشان كده ورغم إن عمر الإنسان على كوكب الأرض 300 ألف سنة تقريبا، لكن لما بنيجي نشاور على الحضارة ولحظة بدايتها بنشاور فى الأساس على لحظة بداية القانون والتشريع.. ومن هنا بتيجي عظمة قدماء المصريين..
مي محمد ✍️✍️✍️