مع اقتراب موسم الحج كل سنة بيظهر المتاجرين بأحلام الحالمين في الوقوف على جبل عرفات، واللي بيحاولوا يستقطبوا أكبر عدد ممكن من الراغبين في أداء مناسك الحج من غير المقتدرين، ويقنعوهم بالسفر للسعودية بتكاليف أقل بكتير من تكلفة الحج الرسمية، وطبعا دا بيكون عن طريق التحايل على القوانين والقواعد المنظمة وإدخالهم المملكة بتأشيرة زيارة وبعد كدا يدخلوا مكة بطرق غير مشروعة.
الأمر دا خطير جدا لأكتر من سبب.. أولا حضرتك كدا بتعرض نفسك وكل المرافقين معاك لرحلة عذاب حرفيا مش حج.. أنت طول الوقت مستخبي وخايف وهربان من قوات إنفاذ القانون في المملكة.. دا غير المعاملة غير اللائقة من القائمين على تسهيل دخولك بالشكل دا.. وطبعا مش محتاج أكلمك عن الإقامة غير الآدمية طول فترة الحج.
ثانيا.. وزارة الحج والسلطات السعودية بتكون مجهزة نفسها لاستقبال عدد محدد وليكن مليون حاج مثلا.. الأعداد اللي بتدخل بشكل غير شرعي وغير قانوني بتكون زيادة عن العدد المطلوب، ودا ممكن يتسبب في مشاكل ومخاطر ليك ولكل اللي متواجدين في الحرم.. زي حالات التدافع والاختناق اللي بيكون سببها الزحام الشديد.
ثالثا بقى لو اتمسكت وانت في الوضع دا فهيتم تغريمك 50 ألف ريال “أكتر من تكلفة الحج بشكل شرعي”.. وممكن يتم حبسك لمدة 6 شهور ومنعك من دخول الأراضي السعودية لمدة لا تقل عن 10 سنوات.
الحج فرض على كل مسلم ومسلمة.. لكن ربنا سبحانه وتعالى قال “لمن استطاع إليه سبيلا”.. يعني مفيش عليك ذنب لو مقدرتش تحج.. لكن إنك تعرض نفسك وغيرك لمخاطر وسوء معاملة دا ذنب…..
مي محمد ✍️✍️✍️