محافظات مصر واصل تسميتها

بور سعيد، مش كلمة واحدة، دول كلمتين، كلمة بورت معناها ميناء.. وكلمة سعيد نسبة الى محمد سعيد باشا والي مصر .. يعني الكلمة على بعضها معناها ميناء سعيد.

وهي زيها زي بور فؤاد .. نسبة الى فؤاد ملك مصر، والد الملك فاروق..

والاسماعيلية نسبة الى الخديوي اسماعيل، وبالمناسبة ميدان التحرير كان اسمه ميدان الاسماعيلبية .. لكن اتغير اسمه لـ”ميدان التحرير” نسبة إلى التحرر من الاستعمار في ثورة 1919 … ومع قدوم ثورة يوليو .. اصبح اسمه ميدان التحرير بشكل رسمي .. وبعد اغتيال السادات سموه ميدان أنور السادات … لكن الاسم رجع تاني لميدان التحرير.. والميدان وفكرته جاية من ميدان الشانزلزيه في باريس اللي كان اسماعيل نفسه يخلي القاهرة نسخة طبق الاصل منها..

طبعا انت كبير كفاية وعارف ان الاسكندرية اتسمت على اسم الاسكندر .. اللي الاجانب بيقولوا عليه اليكزندر .. فاسم الاسكندرية بالانجليزي .. الاكزندريا..

والقاهرة سموها القاهرة تيمنا بقهر الاعداء .. لما بناها القائد جوهر الصقلي اللي خد امر من الخليفة الفاطمي المعز لدين الله الفاطمي .. وجوهر الصقلي كان من جزيرة صقلية .. ويقال ان جده كان حلواني .. علشان كدا سيد حجاب قال اللي “بني بني مصر كان في الاصل حلواني .. ويقال انها اتسمت القاهرة نسبة لكوكب القاهر اللي هو كوكب المريخ.. وفيه 18 مدينة في العالم اسمهم القاهرة..

اسوان بقى كان اسمها سونو .. ومعناها السوق .. علشان كانت منطقة تجارة للقوافل اللي جاية من والى النوبة .. الاقباط سموها سوان .. وبعد كدا اتحرفت لـ اسوان..

أما اسيوط فهي كلمة فرعونية اصلها سأوت .. ومعناها الحارس باللغة المصرية القديمة .. العرب لما جم مصر ضافوا للكلمة حرف الف … فبقت أسأوت .. اللي اتحولت بالتدريج لاسيوط..

اما الاقصر يا باشا .. فهي اسم عربي سموه العرب لما دخلوا مصر .. ولقوا ان المدينة فيها اعمدة كتير زي عمدان القصور .. فسموها الاقصر وهي جمع قصر زيها زي القصور..

اما بني سويف فهي مكتوبة غلط اصلا .. هي اسمها منفسويه بالقبطية .. وكان اسمها كدا طول فترة حكم المماليك .. لكن المساحين الأتراك العثمانيين، خلال الحكم العثماني لمصر .. لما جم يمسحوا البلد حرفوا الكلمة لبني سويف وثبتت على كدا..

موضوع ان مدن الصعيد متسميين على اسم سحرة فرعون ومالهاش اي دليل ..

مي محمد ✍️✍️✍️