هل يا ترى جربت قبل كده انك تدوق طعم صوتك؟!
اسمحلي اقولك يا عزيزي قبل ما تستهزا بالموضوع ان الحاله دي واللي تكاد تكون ما سمعتش بيها قبل كده هي حاله نادره وموجودة فعلا امتلكها واحد اسمه (جيمس ونرتون)
وكان عنده القدرة فعلا ان هو يدوق طعم الصوت !.
طيب ماشي عرفنا انها حاله موجوده ونادره تسمحي تقوليلنا بقى كان بيتذوقه ازاي بردو؟
الراجل جيمس ده امتلك القدره دي من صغره فكان دايما بيحس بطعم مميز على لسانه في كل مره يسمع فيها صوت اي احد بيتكلم؛ يعني مثلا كان بيذوق طعم الكمثرى كل لما يسمع صوت مدرس التاريخ.
والأطباء اطلقوا على الحالة دى اسم “synaesthesia الحس المرافق”
وكمان الحاله دي ساعدته في جوانب كثيره من حياته بمعنى انه ما كنش بيختار اصحابه على حسب شخصيتهم او مظهرهم لا دا كان بيدوقهم بالصوت يعني كان بيشوف الصوت حلو او لا وبعدين يقرر، يعني مثلا اللي يلاقي طعمه فراولة تعالي حبيبي، واللي يلاقي طعمه ليمون غور مش عايزك.
بس بالنسبه للانشطه العاديه واللي فيها ضوضاء زياده زي مثلا السينما او ماتش كوره كان صعب ان هو يقرر طعمها ايه بسبب الضوضاء الكثيره اللي فيها فكان بيتراكم طعمها على لسانه زي كوكتيل كده.
الحاله الفريده دي اثارت الفضول عند الاطباء في جامعه ادنبره في بريطانيا فعملوله فحص على دماغه واكتشفوا وجود تقاطعات في الدماغ وبعضهم فسر ان التقاطعات دي مش معاه هو بس وانها ممكن تكون موجوده في ادمغة ناس ثانيه كمان بس بتختفي مع التقدم في السن بس الراجل ده التقاطعات مختفتش عنده ومكنته من امتلاك حاسه سادسة غريبه وكانت اجزاء كتيرة من دماغه بتتأثر لما يسمع اى صوت وخصوصا الاجزاء اللى مسؤولة عن حاسة التذوق….
مي محمد ✍️✍️✍️