بسنت خالد بنت الغربيه

بنوته من محافظة الغربية قررت تقول للغلط «لأ» بس للأسف موقفها كلفها حياتها..
ممكن متكونشى هى السبب فى «نتيجة موقفها»..الأكيد هى مش السبب طبعا.. ثقافة الخوف حاضرة دايما..
الثقافة السائدة رغم إننا بقينا فى 2023.. وفيه قوانين بتطور.. وعقوبات بتزيد.. ووعى بيختلف.. وجرائم إلكترونية بيتم ردعها
“زى التهديد والابتزاز والتشهير والفبركة سواء كان شفهى أو كتابى ما بين الورقى والإلكترونى”.. بيتم ردعه بالقانون، سواء بقانون العقوبات أو قانون مكافحة جرائم تقنية المعلومات أو كما هو متعارف عليه بقانون الجرائم الإلكترونية.. القضية كلها إننا لازم نكون قدام بلاغ وتحرك من الضحية.. وده هيكون تأثيره أفضل لما تكون الأسرة مؤمنة بده وعندها الثقة في ولادها وبناتها ومتفرضش عليهم ثقافة الخوف اللى لو سيطر على أى حد فى الوقائع المشابهة هيضيع حقه..
عندنا جريمة.. وعقوبة.. يبقى لازم البلاغ والتحرك.. وده منصوص عليه فى القانون، يبقى «لو أى حد مكان بسنت خالد» في مجموعة خطوات لازم يعملها:
أولا لازم يبلغ وميخافش، والخطوات سهلة وواضحة من خلال 3 طرق وهي إما تقديم الشكوى من خلال الموقع الرسمي لوزارة الداخلية، أو استخدام الخط الساخن (108) واللي تم تدشينه مؤخرًا، وهو خط مخصص للإبلاغ عن الجرائم الإلكترونية، وجرائم الإنترنت، ويعمل على مدار 24 ساعة..
ثانيا لازم يخطر إدارة مكافحة جرائم الحاسبات وشبكات المعلومات بمقر وزارة الداخلية بالتجمع الخامس في القاهرة الجديدة، بالحضور الشخصي أو الاتصال بأرقام تليفونات: 27928484 / 27926071 / 27921490 / 27921491. ومن أهم الحاجات اللى لازم يعملها الاحتفاظ بالرسائل محل «الابتزاز» أو السب أو القذف أو أيا كانت الجريمة، والتوجه لأى من أقسام تكنولوجيا المعلومات بمديرية الأمن التابع لها ويعمل بلاغ..
أخيرا أحب أقولكم إن احنا عندنا دلوقت قانون رادع لجرائم الإنترنت بيتضمن 45 مادة موزعة على 9 فصول تحتوي على ضوابط وعقوبات الاستخدام السيئ للإنترنت، والتعرض لسرقة البيانات الشخصية للأفراد، ومتضمن عقوبات تصل إلى السجن من سنتين إلى 5 سنوات، وغرامات تصل إلى 250 ألف جنيه..
متخافوش واحموا حقكم بالقانون..

مي محمد ✍️✍️✍️