خلال الأيام اللى فاتت كان فى واقعة اهتم بيها الناس فى مصر لمجموعة من المحتالين أقاموا مقبرة وهمية بغرض الاحتيال على الراغبين فى تجارة الآثار، وكان الأمر لافت للانتباه لدرجة أن الدكتور مصطفى الوزيرى الأمين العام للمجلس الأعلى للآثار عاين المقبرة بنفسه وخرج فى فيديو من داخل المقبرة عشان يقول إنها مزيفة بالكامل وكل النقوش اللى فيها حديثة عمرها ميزيدش عن سنة وكمان القطع الأثرية اللى فيها غير حقيقية وزيها زى الموجودة فى البازارات وخان الخليلى ومحلات الهدايا..
النيابة العامة فى بيانها عن الواقعة أكدت أنها طلبت ضبط وإحضار الناس اللى أقامت المقبرة.. وده يخلينا نسأل سؤال مهم: “هل فيه عقوبة لجريمة الاحتيال في الإتجار بالآثار اللي هي اصلا آثار مغشوشة؟”
المؤكد إنه صعب أي شخص يعمل بلاغ يقول فيه إنه اتعرض للنصب والاحتيال في تجارة الآثار لأنها بطبيعة الحال تعتبر تجارة مجرمة وعمل يعاقب عليه القانون، وبالتالى مفيش هنا بلاغ.. مع ذلك فيه مادة واضحة فى القانون رقم 91 لسنة 2018 بشأن حماية الآثار أقرت عقوبة السجن لمدة لا تقل عن 3 سنوات ولا تزيد عن 7 سنوات وبغرامة لا تقل عن 100 ألف جنيه ولا تزيد عن مليون جنيه لكل من زيف أثرا بقصد الاحتيال..
يعنى الجماعة اللي عملوا الواقعة دي والذي وصفتهم بعض المواقع الإخبارية أنهم “لصوص لكن ظرفاء” قاموا بعمل مخالف قانونا ومعرضين للحبس..
مي محمد ✍️✍️✍️