يعنى ايه إتجار بالبشر؟
عدد كبير من المتابعين بيسألوا، ليه مجموعة من الجرائم فى الفترة الأخيرة بيتم إحالتها للنيابة العامة بتهمة الإتجار بالبشر مع أن الواقعة محل التحقيق قد لا تبدو على هذا النحو، على سبيل المثال السيدة اللى خرجت عبر مواقع التواصل الاجتماعى خلال الأيام اللى فاتت فى فيديو ومعاها طفلين عمرهم أقل من 10 سنوات وخلتهم يحكوا وقائع اعتداء مخلة ومؤسفة من أشقائهم الكبار عليهم، بطريقة مشينة ومنافية لكل القيم والعادات والتقاليد اللى تربينا عليها..
السيدة دى تم القبض عليها والنيابة وجهت لها تهمة الإتجار بالبشر وده لأن القانون نص بشكل واضح فى المادة الثانية على أن أى صورة من صور استغلال الأطفال تعد إتجار بالبشر.. وفى المادة 3 من القانون أكد على أنه لا يشترط لتحقق جريمة الإتجار بالبشر فيما يخص الأطفال استخدام أى وسيلة من الوسائل المتعارف عليها والمنصوص عليها فى القانون، وأنه أيضا لا يعتد برضا الطفل أو رضا المسئول عنه، وده عشان محدش يقول إن دى أمهم أو أنهم فى حضانتها أو أنها ولية أمرهم لا.. القانون منح حماية أكبر للأطفال وللفئات عديمي الأهلية حتى من أولياء أمورهم..
النقطة التانية اللى الناس لازم تفهمها إن صور الإتجار بالبشر كتير جدا وبيدخل فيها جرائم تانية زى التسول وعصابات الهجرة غير الشرعية وتجارة الأعضاء وشبكات ممارسة الأعمال المنافية للآداب وأى عمل فيه نوع من السخرة أو استخدام القسوة، وأحيانا عمالة الأطفال يمكن أيضا اعتبارها إتجار بالبشر عشان كده بنقول إن الناس لازم يكون عندها وعى قانونى لأنها ممكن تلاقى نفسها متورطة فى جريمة دون أن تدرى..
مي محمد ✍️✍️✍️