مخترع الواي فاي

بتبقى فرصة عظيمة من وقت للتاني إننا نتعرف عن نماذج مصرية عظيمة ومُلهمة كان ليها دور وبصمة في منتهى القوة عالمياً من خلال تميزهم في مجالاتهم المختلفة اللي أشاد بيها العالم كله وبقت جزء لا يتجزأ من حياة الملايين!.. النهاردة كلامنا عن العالم المصري الدكتور “حاتم زغلول” مخترع جهاز الواى فاى!..

كانت معلومة تشّرف إننا نعرف إن صاحب فكرة الجهاز اللي موجود النهاردة في كل بيوتنا وبيوت ملايين البشر في العالم مصري!.. الدكتور “حاتم” من مواليد 7 فبراير سنة 1957.. من صغره وهو ميال لدراسة الهندسة والتكنولوجيا.. دخل كلية الهندسة جامعة القاهرة قسم الاتصالات وحصل منها على البكالوريوس سنة 1979.. بعدها درس كمان الرياضات التطبيقية في جامعة عين شمس ثم سافر لـ كندا عشان يحصل من هناك على الماجستير في الفيزياء!..

خلال مداخلة مهمة للدكتور “حاتم” في برنامج التاسعة” المُذاع على القناة الأولى في التلفزيون المصري قال للإعلاميين “مصطفى كفافي”، و”بسنت الحسيني”: (التعليم المصري أسس عندي العلم بطريقة صحيحة)..

د.”حاتم” قال إنه تم تقديم اختراع الواى فاى في مارس سنة 1992 وفي شهر أكتوبر 1993 تم تصميم نموذج للمواطنين وكان حجمه كبير لكن هو وزمايله قدروا في سنة 1997 يصغروا حجمه ويبقى على موصل واحد.. وفي سنة 2003 وتحديداً في الربع الأول من السنة تم بيع 21 مليون جهاز واى فاى ودلوقتي العدد تجاوز 23 مليار جهاز واى فاى في العالم كله!..

ولإن الشغف والأحلام مش بينتهوا د.”حاتم” قال إن هو وزمايله في الوقت الحالي بيشتغلوا على مجموعة من الدراسات هدفها البحث عن طرق لإدخال الاتصالات في الدول اللي ماوصلتش ليها حتى الآن خصوصاً إن نص الكرة الأرضية مفيهاش أى نوع من أنوع الاتصالات!..

مصر ولّادة ودايماً فيها نماذج محترمة وعلماء ليهم بصمة وتأثير في كل المجالات.. الدكتور “حاتم زغلول” واجهة مصرية مشرفة وواحد من ملايين رفعوا اسم بلدهم بعلمهم ومجهودهم.

مي محمد ✍️✍️✍️