قضية غسل الأموال من أصعب القضايا اللي بتمر على المحامي وعلى النيابة وعلى القاضي.
ليه؟
لإنها بتقوم على فكرة التمويه والإخفاء بمعنى إن المال المتحصل من جريمة بيتم تدويره في عدد من العمليات المالية عشان مصدره الحقيقي يختفي ودا بيصعب من مهمة كل أطراف العدالة.
جريمة غسل الاموال لازم ليها ركنين: ركن مادي وهو الحصول على أموال بطريق غير مشروع (تجارة مخدرات، دعارة، سرقة ….. إلخ)
أو إستغلال أموال مشروعة في تمويل عمليات إجرامية زي تمويل ارهاب وجرائم التلاعب بالاقتصاد والايهام بإنها انصرفت في مجال آخر.
اما الركن المعنوي فلازم يكون المتهم عارف بعدم مشروعية مصدر المال أو عدم مشروعية النشاط المصروف عليه ويكون قصده انه يخفى مصدر المال أو وجه انفاقه.
في جرائم غسل الأموال بتكون النتيجة الإجرامية هي اضفاء المشروعية على مال ناتج من جريمة.
مثلا: تاجر مخدرات يفتح شركة استيراد ويستورد بضايع عشان يبيعها بالخسارة بلغة السوق: يحرق البضاعة!
وبعدين يسجل في الدفاتر أرباح غير حقيقية أرباح المخدرات طبعا التسجيل ده هو النتيجة الإجرامية لإن كدا اتوجد مصدر مشروع للمال على خلاف الحقيقة.
ليه غسل الأموال مجرم؟!
في سببين مهمين:
١. أن المال السايل بيخرج من الدولة اللي تم ارتكاب النشاط غير المشروع فيها ودا اسمه استنزاف اقتصادي.
٢. استخدام المال في أمور وهمية أو غير إنتاجية بيؤدي لحالة ركود زي إن الجاني يشتري لوحة غالية أو تحفة أو يخت وده لإن تجميد المال في التحف بيأثر على دوران راس المال….
مي محمد ✍️✍️✍️