واحنا على أبواب عام دراسى جديد.. كل الأسر بتحاول تقدم توعية لأبنائها وازاى يتصرفوا فى المواقف المختلفة بشكل يحفظلهم حقهم وكرامتهم ويليق بيهم كطلاب علم، ويمكن من أهم الاسئلة اللى الأسر بتتوقف أمامها هو نعمل ايه لو الطفل تعرض للضرب أو الإساءة أو التنمر أو الإهانة من المدرس فى المدرسة؟
فى البداية أحب أقول إن أحيانا بيحصل بين المدرس والطالب نوع من أنواع التوجيه أو الحدة فى إطار الرغبة فى التقويم، وده شئ بيخضع لتقدير ولى الأمر خاصة إن مفيش رغبة فى الإيذاء.. وبالتالى بيكون التصرف هو التواصل مع المدرس وتنبيهه لأى ملاحظة، لكن لما بيكون العقاب المادى مبالغ فيه أو عقاب معنوى بينطوى على تنمر وسخرية وإهانة هنا لابد ولى الأمر يتحرك ويحافظ على حق ابنه وده من خلال مجموعة من الخطوات..
أولا: هنقول لابننا إنه يكتب بالتفصيل كل حاجة تعرض ليها سواء كان ضرب أو إهانة أو سب أو قذف ومنخليهوش يعتمد على الذاكرة لأنه ممكن ينسى حاجة تكون سبب فى ضياع حقه.
ثانيا: هنطلب من ابننا إنه يتوجه لإدارة المدرسة أو للأخصائى الاجتماعى ويحكى اللى اتعرضله بالكامل كنوع من إثبات الحق.
ثالثا: ولى الأمر هيكون قدامه إما إنه يلجأ لقسم الشرطة ويحرر محضر أو إنه يلجأ لإدارة المدرسة ويتقدم بشكوى ويتابع مسارها أو إنه يلجأ للمسارين سويا، لكن أنا دايما مبفضلش اللجوء لأقسام الشرطة تقديرا لقدر المعلم إلا فى حالات العنف اللى بيترتب عليها إيذاء بدنى أو معنوى كبير.
مهم هنا الإشارة إلى أن قرارات وزارة التربية والتعليم من سنة 98 إلى اليوم واضحة فى هذا الشأن وهو منع الضرب والإيذاء فى المدارس وتفعيل دور الأخصائى الاجتماعى فى المقابل وأن مدير المدرسة هو الشخص المنوط به الإشراف على تنفيذ هذه القرارات.
اعرفوا حقكم وحق ولادكم وعلموهم يحموا حقهم من الضياع..
مي محمد ✍️✍️✍️