ناس كتير مننا بتتعرض لـ”خــطف” الموبايل، أو “ســرقته” لا قدر الله، لكن بفضل التكنولوجيا الحديثة، والتطور المذهل لأداء المباحث الجنائية فى مصر، أصبحت هذه السرقة محكوم عليها بالفشل المحتوم، والقبض على المجرم.
لو لا قدر الله تعرضت لهذا الموقف، مطلوب منك التوجه لأقرب قسم شرطة، ومعاك العلبة بتاعة الموبايل، واللى عليها الـ “سيريال نمبر” بتاع الموبايل، وده عبارة عن رقم خاص بجهاز تليفونك لوحده، مالهوش أي مثيل فى العالم كله.
الشرطة بتاخد بياناتك، وبتقدم طلب استعلام عن مكان الموبايل، ورقم الشريحة اللى موجودة فيه، ولما المحضر بيروح النيابة، بتراسل النيابة شركة المحمول اللى بتعمل استعلام.
بمجرد ما تتحط شريحة موبايل جديدة فى التليفون المسروق، بتبان فورا عند شركة المحمول إن التليفون المبلغ بسرقته اتحط فيه شريحة برقم كذا، باسم كذا، اللى عنوانه فى المكان الفلاني.
بترد شركة المحمول على النيابة، اللى بتطلع أمر ضبط وإحضار لصاحب شريحة المحمول اللى اتحطت فى الموبايل، وبتتحرك الشرطة فورا للقبض عليه، وبيمثل أمام العدالة، وبيتم تقديم التليفون لصاحبه بعد تقديم طلب.
لذلك احنا محتاجين نعمل حاجتين مهمين جدا، أولا إننا لما نشتري تليفون نحتفظ بالعلبة بتاعته، علشان نحفظ رقم السيريال نمبر، وتاني حاجة إننا أبدا ما نشتريش تليفون من شخص مجهول بدون علبته وسيريال نمبر على العلبة متطابق مع السيريال نمبر اللى على ظهر الموبايل.
انت الشخص الوحيد اللى ممكن يساعد الحرامي إنه يفلت من فعلته دي، بإنك تكسل إنك تقدم بلاغ للشرطة وطلب استعلام للنيابة، وتضيع حقك، وتساعده إنه يواصل فعلته دي..
لذلك لو لا قدر الله بمجرد ما موبايلك يتاخد منك، لازم تتحرك فورا، وبدون تردد، وتتجه للشرطة.
مي محمد ✍️✍️✍️
عندك موضوع شبه ده؟احجز استشارة مع محامٍ متخصص، حضوري أو أونلاين.
احجز استشارة ←
