ليه بنقول رايحين مصر…
الناس اللي اتفاجئت من محافظات مصر وتقسيمة الاقاليم.. خليني اقولك ان كان عندنا شوية محافظات غريبة غرابة.. بس اتلغوا .. اه والله .. بس خليني اقولك الاول جات منين التقسيمات دي .. واقولك ايه هي المحافظات الملغية .. فيلا بينا
اول ما مينا وحد القطرين .. لان احنا كنا قطرين .. مملكة الشمال والجنوب … ودا كان سنة 3200 ق. م ( وق.م دي لما تلاقيها في اي تاريخ اعرف انها تعنى قبل ميلاد السيد المسيح عليه السلام).. وساعتها مينا خد القاب كثيره.. ملك الأرضين، صاحب التاجين، نسر الجنوب، ثعبان الشمال، هداف دوري الابطال.. وهنا يحضرني قول الشاعر بتوحدهم ليه يا مينا ما كنت سبتهم كدا مش يمكن كان قُطر فيهم نفع..
المهم بعد ما مينا وحدهم .. قرر انه يقسمهم .. ازاي .. قالك احنا هنقسمهم 42 أقليم (محافظة او مديرية).. كل اقليم عليه حاكم .. الحاكم دا يتبع الفرعون .. يدفع الضرايب وينفذ اوامر الحاكم ويجيش الجيوش .. حاجة كدا زي المحافظ في كل محافظة.. وفضل الحال يروح ويجي .. ومصر اتدهورت .. والقبلي دخل ع البحري واللي ثاروا عليه قالوا ولا يوم من ايامه.. لحد ما جه نابليون بونابرت .. نابليون بونابرت جه من بلد فيها تنظيم اداري.. فحب ينقل التجربة لمصر..
فعمل تقسيم اداري..
راح مقسم البلاد لـ 13 مديرية أو ولاية.. هى الجيزة، القليوبية، الشرقية، المنوفية، الغربية، الدقهلية.. أما ولايات الوجه القبلى فهى أطفيح «أحد مراكز الجيزة الآن»، الفيوم، البهنساوية، الأشمونين، المنفلوطية، جرجا
وكان بيدير الولاية فى الوجه البحرى موظف يسمى «الكاشف» وفى الوجه القبلى يسمى «المتصرف».. وجنب الولايات دي ست محافظات هى الأسكندرية، رشيد، دمياط، العريش، السويس، القصير… لغاية دلوقتي تقسيم الولايات موجودة في امريكا .. وتونس مثلا..
المهم مشيت الحملة سنة 1801 . ومسك محمد علي .. محمد علي قسم مصر لـ 14 مديرية .. ولغي تقسيم الولايات وخلاها مأموريات والكلام دا سنة 1827 .. يعني المحافظة هنسميها مأمورية .. وبعد كدا بـ 7 سنين .. لغى المأموريات وخلاها مديريات ..
وتعالى مثلا اديك مثال للعك اللي بيحصل في الموضوع دا.. عارف الجيزة .. الجيزة دي يعني ايه .. عمرك سألت نفسك يعني ايه جيزة .. اكيد لا .. وبنسبة كبيرة ناس كتير متعرفش.. الجيزة : جانب الوادي أي جانب وادي النيل، وكذلك تعني مقدار الماء الذي يَجُوز به المسافرُ من مَنْهل إِلى منهل…
طيب الجيزة .. فى عهد الفراعنة والبطالمة والرومان .. كانت مقسومة لثلاثة أقسام منفصلة .. جم الفاطمييين حكموا مصر … خلوا اوسيم ومنف قسم واحد وسموه الجيزية .. وخلوا قسم تاني سموه اطفيح.. في عهد محمد علي سماها ولاية الجيزة .. وبعد كدا خلاها مديرية الجيزة ..
وفي سنة 1838… صدر الأمر بالغاء مديرية الجيزة وضمها إلى مديرية أطفيح.. يعني مفيش حاجة اسمها الجيزة .. كلها اسمها مديرية اطفيح … قرار حكيم ومدروس اهو .. بعدها بـ 3 سنين .. هو هو محمد علي قرر يرجع الجيزة تاني .. طيب كنت لغيتها ليه .. وترجعوها.. مديرية الجيزة وأطفيح.. كدا القرار اكثر حكمة .. هو انا مقلتلكش .. مش محمد علي اصدر قرار ان يبقى اسمها الجيزة بس .. واطفيح تتحذف .. وحاليا اطفيح بقت مركز في الجيزة ….
طيب تلاقى اخواتنا بتوع الصعيد لما يجي القاهرة يقولك انا رايح مصر .. طيب ما سوهاج دي مصر .. وبورسعيد دي مصر .. ما تقول رايح القاهرة .. والحقيقة دا ليه سببين .. السبب الاول هو النظام المركزي الغبي … اللي خلى كل الخدمات في مصر .. يعني هديك مثال امبارح مش من 20 سنة .. اللي بيعمل تظلم في الثانوية العامة بيجي يعمله في اكتوبر .. طيب انا من الاقصر .. تيجي اكتوبر .. طيب يا بني انا من حلايب وشلاتين .. تيجي تعمله في اكتوبر .. شوف مواصلات قد ايه .. شوف تعب قد ايه .. شوف مصاريف قد ايه .. مع ان التظلم دا يخلص بزووم ميتنج في 10 دقايق … بس مش موضوعنا..
السبب التاني اللي بيخلي اللي رايح القاهرة يقول انا رايح مصر .. هو الورث الثقافي .. يعني ايه ..
القاهرة كان ليها وضع خاص في التقسيم الاداري زي احمد زكي في مدرسة المشاغبين .. فالقاهرة كانت تحت ادارة اكبر موظف بعد الوالي .. وكان يُسمي بشيخ البلد .. وكن ليه اتنين معاونين أغا المستحفظان والمحتسب .. ودا شخص بيراقب الأسواق و الدكاكين و التفتيش على المكاييل و الموازين..
وساعتها القاهرة كانت تابعة لديوان محمـد على باشا مباشرة.. وبعد كدا فصلوها وخلوها ضبطية مصر .. هي اسمها كدا .. ضبطية مصر .. مفيش القاهرة دي .. واتغيرت ضبطية مصر لمحافظة مصر … فى عهد محمـد سعيد باشا .. ودا الإبن الرابع فى سلالة الأسرة العلوية … (محمد علي حكم، وبعده ابراهيم، وبعده عباس، وبعده سعيد) وفضل الاسم كدا لحد قيام ثورة يوليو سنة 1952 ..
مي محمد ✍️✍️✍️