لو معاك شقة أو عقار أو حتة أرض فى واحدة من المدن الجديدة أو المناطق التابعة لهيئة المجتمعات العمرانية، أو ناوى تشترى.. يبقى لازم تعرف تفاصيل التعديل الجديد فى قانون الشهر العقارى اللى أقره مجلس النواب ..
التعديل ده بينص بشكل صريح على تسجيل كافة الأراضى الخاضعة لولاية هيئة المجتمعات العمرانية، سواء كانت تجمعات سكنية “كمباوندات” أو أراضى خلال ١٥ يوم من عملية الشراء.
طيب وفى حالة إن اللى اشترى من هيئة المجتمعات مراحش يسجل عقاره ايه اللى يحصل؟
فى الحالة دى وفق التعديل الجديد، هيئة المجتمعات العمرانية الجديدة هى اللى هتقوم بكافة إجراءات التسجيل، ولكن على حساب مشترى العقار اللى هيسدد قيمة التسجيل طبعا، واللى مش هتزيد بكل الأحوال عن 4 آلاف جنيه حد أقصى للوحدة حسب المساحة، يعنى ممكن شقتك يبقى تسجيلها بألف جنيه.. وده الفرق اللى بين الأرض والوحدات السكنية التابعة لهيئة المجتمعات وبين الأرض والمبانى الموجودة داخل الأحياء القديمة..
لأن زمان مكناش عارفين نسجل الأرض بتاعتنا أو العقارات التابعة للأحياء والمحافظات لأن للأسف كانت أصل الملكية غير مسجلة، ومكناش عارفين مين اشترى من مين، وكنا طبعا بنروح نرفع دعوى صحة ونفاذ وإجراءات كتيرة معقدة ومصاريف كتيرة، إنما دلوقت الأرض المملوكة لهيئة المجتمعات العمرانية، والخاصة بالأجهزة والمدن فى المجتمعات الجديدة هتكون كلها مسجلة، لأن القانون قبل كده ألزم هيئة المجتمعات باعتبارها مالك إنها تسجل كل ممتلكاتها، وبالتالى العقار هيكون لها أصل مسجل، من اول مالك حتى المشتري اللي بيقوم بالتسجيل وكل تابع له هيكون سهل تسجيله..
لو انت شارى وحدة من زمان من مطور عقارى مشترى الأرض من هيئة المجتمعات، هل يسرى عليك القانون؟
القانون ده ملزم للمطور اللى انت اشتريت منه عقارك، بمعنى إن الشركة اللى اشترت الأرض من الهيئة ملزمة بالتسجيل خلال مدة الأسبوعين اللى نص عليها القانون ولو مسجلتش الهيئة هتسجلها وعلى حسابها، وانت اشتريت من الشركة، فى الحالة دى انت تقدر تروح تسجل وحدتك بدون تعقيدات وتستفيد من تسجيل أرض الكومباوند، وده سارى على الأراضى والعقارات اللى بتشتريها من شركات القطاع الخاص، أو حتى وحدات الإسكان الاجتماعى، ولكن بشرط تكون سددت تمنها بالكامل..
مي محمد ✍️✍️✍️