لو عندك محل أيا كان نشاطه يبقى المقال ده يهمك..
الحكومة هتبدأ تطبيق قانون المحال العامة إن شاء الله، والقانون ده صادر من سنة 2019 لكن لحد دلوقت مكانش اتطبق لأن كان فيه صعوبات كتير فى التطبيق أهمها عدم تأهيل موظفى المحليات.. والقانون ده بيهم كل واحد عنده محل فى أى مكان فى مصر.. ولازم كل واحد يقنن أوضاعه وفق الشروط الجديدة اللى أقرها القانون..
القانون ده مصنف محلات مصر كلها لـ 316 نوع حسب نشاطها، وهى محال الأغذية وتربية الحيوانات والطيور والمطاعم والكافتيريات والكافيهات والمقاهى ومحلات المجازر، والملابس والمفروشات والمنتجات الجلدية، ومحلات البناء والتشطيبات، ومحلات بيع وإصلاح الأجهزة الكهربائية والإلكترونية، والمكاتب ومحلات الخدمات والسيارات والموتوسيكلات والدراجات والأثاث والديكور، وكمان مجموعات خاصة بالمواد البترولية والطاقة والبنسيونات والملاهى وأماكن التسلية والمناسبات والورش والأعمال الحرفية والمخازن..
ايه بقى المطلوب منك لو عندك محل شغال فى أى نشاط من دول؟
هيكون مطلوب منك تجهز الورق ده عشان تبدأ توفيق أوضاعك مع الاشتراطات الجديدة للقانون، وهى: “صورة البطاقة الشخصية، صورة عقد الملكية أو الإيجار، صورة رخصة البناء أو التصالح، إفادة من التنظيم بموقف المحل، رسم كروكي، صورة البطاقة الضريبية”.. وقدامك طريقتين لتقديم ورقك الأولى هو التقدم بطلب الترخيص إلكترونيًا عن طريق الموقع الإلكترونى لمنظومة التراخيص واللى هيتم الإعلان عنه، والطريقة التانية إنك تروح لمركز التراخيص التكنولوجى وتتقدم بطلب ترخيص من خلال النموذج المعد هناك.
فى حالة قبول طلبك بصفة مبدئية، هتسدد رسم معاينة لا يتجاوز 1000 جنيه، خلال شهر من إخطارك بالموافقة، وفى حالة توافر الاشتراطات العامة والخاصة بالمحل، هيصدر لك الترخيص فى مدة لا تتجاوز شهر من تاريخ التأكد من استيفاء الشروط مع دفع الرسوم المطلوبة، وفى حالة عدم توافر الاشتراطات، هيكون قدامك مهلة لا تتجاوز 3 أشهر لتنفيذ الاشتراطات العامة والخاصة.
اللجنة العليا لتراخيص المحال العامة هتعلن مع دخول القانون حيز التطبيق كل الإجراءات الخاصة بالرسوم والاشتراطات العامة والخاصة المطلوبة فى كل محال من المحالات اللى تم تصنيفها ….
مي محمد ✍️✍️✍️