كتير من الناس لما بتستأجر عقار سواء سكني أو تجاري أو لأى غرض، بتتعامل بحسن نية شديدة سواء فى كتابة العقد، أو المطالبة بإيصال سداد الإيجار، خاصة لو فيه معرفة قوية بين المستأجر والمؤجر فبيتعامل الشخص بحسن نية لكن ده غلط، لأنه ممكن يضيع حقوقه..
وعشان كده مهم جدا الحرص على وضع بنود وشروط محددة فى عقد الإيجار وده اللى هنتكلم فيه النهاردة، ويمكن أهم الشروط دى؛ ذكر جميع أطراف العقد بوضوح اللى هى اسم المؤجر والمستأجر وعنوان كل منهما ورقم البطاقة الشخصية ورقم التليفون، مع وصف دقيق للعين المؤجرة “العنوان – رقم الشقة – المساحة – عدد الغرف – ملحقاتها – نوع التشطيب – مفروشة أم غير مفروشة”، مع تحديد مدة العقد خاصة تاريخ البداية والانتهاء بشكل دقيق وواضح، وبيان مدى التزام الطرفين بمدة العقد، وهل يجوز إنهاء العقد قبل مدته أم لا، وفي الحالة دى مدى التزام أي طرف بدفع التعويض من عدمه..
مهم كمان ذكر جميع البنود المالية؛ بداية من قيمة التأمين وحالات استرداده، وموعد الإيجار الشهري وطريقة سداده بايصال أو إيداع بنكي أو تحويل والإقرار إن الدفع بأي من هذه الطرق يعتبر مخالصة سداد الإيجار عن هذا الشهر ، وغرامة التأخير في السداد، ومعدل الزيادة السنوية في حال الاتفاق عليها، وطبيعة العقار سواء كان سكني أو تجاري، والنص على الجزاء في حال إخلال أحد الطرفين ببنود العقد، وتوقيع المؤجر والمستأجر على كل ورقة من أوراق العقد..
والملاحظ إن البعض بيتساهل فى طلب المخالصة الشهرية بحسن نية أو زيادة ثقة، وده بيدى الحق لمؤجر العقار طرد المستأجر للإخلال ببنود العقد والتخلف عن سداد الإيجار الشهرى، وبالتالى مهم جدا المطالبة به لإثبات سداد الإيجار شهريا، والتأكد من استيفاء العقد كل الشروط السابقة عشان تحافظ على حقك فى عقد الإيجار..
مي محمد ✍️✍️✍️