سعد زغلول، عبد العزيز فهمى، مكرم عبيد، عبد الرحمن الرافعى، مفيدة عبد الرحمن، أحمد نبيل الهلالى، محمد صبرى أبو علم، أحمد الخواجة، عبد العزيز الشوربجى، سامح عاشور، رجائى عطية وغيرهم كتير ….
اختار أى اسم من دول واقرأ عنه لو عايز تعرف قيمة وهيبة المحامى فى المجتمع ولا تستقيم منظومة العدالة بدون المحامى فهو دائما جزء من إدارة المشهد العام لصالح المواطن.
وبعيدا عن المشاهير .. هناك آلاف المحامين اللى ترافعوا لوجه الله ورفضوا تقاضى أتعاب من ناس بسيطة لمجرد إيمانهم بأن المحاماة رسالة مش بس مهنة هدفها الربح وإن أحيانا بيكون مكسبك الحقيقى إنك أنصفت شخص مظلوم أو رجعت حق مسلوب لصاحبه.
الكلام ده أنا بقوله لأنى فوجئت بتورط محامين فى محاولة لإفساد الأدلة وتضليل العدالة في قضية حادث الشيخ زايد، بالادعاء بأنهم ممثلين لجهة قضائية، وتناسوا إن دورهم هو مساندة الجهة القضائية حتى لو كانوا مدافعين عن المتهم.
بستغرب جدا إن المحامى اللى بيمثل القضاء الواقف يتحول إلى عائق في تنفيذ العدالة، فى مشهد يمثل إنعدام للأمانة والشرف المهنى، وأعتقد أن المحامين دول لو كانوا فكروا فى خطة للدفاع عن موكلهم أكيد كان هيبقى أفيد وأنفع من محاولة إتلاف دليل في القضية.
صحيح فيه إجراءات قانونية وقضائية تم اتخاذها ضد المحامين منتحلى الصفة، لكن أعتقد مطلوب إجراء آخر من نقابة المحامين دفاعا عن شرف مهنة المحاماه.
مي محمد ✍️✍️✍️