تخيل معايا كده انك قاعد بتتصفح الفيس بوك عندك عادى وفجأة وانت بتقلب كده لقيت صور لقرية جميلة جدا ومن كتر جمالها دخلت دماغك وقولت لا ده انت لازم تروح هناك تشوفها عن قرب وتتفسح فيها شوية وفعلا عزمت النية وروحت ولما وصلت ملقيتش هناك اى بنى آدمين اطلاقا، جيت تبص عالاشجار والبيوت تلاقيها خربانة وحالهم مش ولابد وانهم منظر من بره بس زى المثل اللى بيقولك “من بره هالله هالله ومن جوه يعلم الله”، ايه ده يعنى فين القرية الجميلة اللى انت شوفتها ف الصور من ده كله دى طلعت قرية وهمية؟!
قرية وهمية ازاى هو ممكن يكون فى قرى وهمية فعلا
ايوه ي سيدى فى قرى وهمية وحكايتها بدأت سنة 1787 لما الملكة (كاترين) اعظم امبراطورة لروسيا كانت زهقانة ف يوم كده فقامت ندهت على (غريغوري بوتيمكين) القائد العسكرى العبقرى واللى كان بيعشقها ف نفس الوقت بس ف السر , المهم قالتله تعالى انا زهقانة وعايزة اخرج شوية تعالى نروح الاراضى اللى احنا احتليناها فى شبه جزيرة القرم ابص عليها بصة كده، فقالها ماشى ي ست الكل،
بس الاراضى دى بقى ي سيدى كانت خربانه وفقيرة عالاخر خالص و غريغورى ده قال ف نفسه انها لو شافت الاراضى ف الحالة دى هتزعل جدا فقرر ان هو يعمل قرى وهمية وجميلة على طول الطريق اللى هيا هتمشى عليه وعمل واجهات بيوت مدهونة بالوان جميلة وجاب قطيع واحد من الحيوانات على طول الطريق على اساس ان الريف مليان حيوانات يعنى، وحط اكياس قمح مليانة رمل عشان يوهمها ان المحصول اتزرع واتحصد كمان، وامر الفلاحين انهم يقفو على الطريق ويوزعولها ابتسامات عريضة
وبالفعل العشيقة المغفلة صدقت الخدعة وزيارتها مرت مرور الكرام من غير اى شك، ومن هنا بقى نشأ مصطلح (قرى خيالية او قري بوتيمكين) وبدأ الناس يقلدو غريغورى فى خدعته ويعملو مدن خيالية
زى مثلا قرية اسمها دونغ فى كوريا الشمالية اتبنت فى خمسينيات القرن الماضى، القرية دى تبصلها من بعيد كده تشوفها طبيعية وجميلة عادى جدا بس لو
دققت نظرك فيها كويس هتلاقى ان الشبابيك مفيهاش ازاز ومفيش اى حد بيعيش فيها، كل اللى هناك هما عمال الصيانة وبس حتى انهم بيعملوها ضوضاء واصوات عالية جدا بتشتغل على مكبرات صوت والهدف من ده كله هو انهم يطلعو كوريا الشمالية مكان خيالى ومزدهر صالح للعيش فيه وعشان يجذبوا القروييين من كوريا الجنوبية ليها الا ان لحد الان الطريقة دى منفعتش ومفيش حد بيروحلها خالص…
مي محمد ✍️✍️✍️