فضيحة “سام بانكمان”

حضراتكم أكيد تعرفوا أو سمعتوا عن العملات الالكترونية.. دا عالم كبير جدا.. المهم إن العالم دا النهاردة لا يتكلم إلا عن فضيحة “سام بانكمان”….

سام بانكمان دا عملاق العملات المشفرة، واللي سقط فى الهاوية، زي ما بيقولوا، وأُدين بتهمة الاحتيال والنصب، وبيواجه حكم بالسجن يصل لـ 20 سنة..

واللى مش عارف “بانكمان” هو شاب أسس سوق كبير لتداول العملات المشفرة اسمه FTX والسوق ده كانت قيمته تقترب من 32 مليار دولار !!

لكن السوق دا طلع مجرد منظومة متكاملة من السرقة والنصب على المودعين، وقدر “بانكمان” الشاب الصغير، الذكي صاحب الـ 29 عاما من سحب أموال المودعين، والمضاربة بها في صندوق أسهم في البورصة، عالي المخاطر…

وبسرعة أفلس الصندوق، وأفلست منصة التداول، واكتشفنا أن “بانكمان” مجرد نصاب كبير، استولى على أموال أكثر من مليون شخص..

يا جماعة هي دي مشكلة “العملات الرقمية” المشفرة، اللى أصحابها صدعونا عند خروجها إلى النور بأنها المستقبل المتكامل لتداول العملات، لكن الحقيقة إنها حتى الآن ليست سوى “فقاعة”، ولا يمكن الاعتماد عليها، لأنها بتعتمد بشكل أكبر على المضاربة أكتر من أنها قيمة حقيقية، ولما تنهار فانهيارها بيكون مدوي ومفزع ومرعب..

المهم إننا لازم نعرف إن الخطر مش في الغرب بس، لا، عندنا كمان موجود، فيه ناس في مصر بتحاول تقنع  ناس تانية بالاستثمار في “البيتكوين”، وغيرها من العملات المشفرة، وبيوعدوهم بأرباح كبيرة، والحقيقة إن كل ده وهم وخداع، وفقاعة ممكن تنفجر فى أي وقت من الأوقات، زي ما انفجرت فقاعة FTX ..

ونقدر نقول بكل ثقة أنه حتى هذه اللحظة العملات المشفرة مش قادرة تثبت جديتها فى التعامل، أو صمودها فى وجه التقلبات، صحيح البعض استفاد وربح منها، لكن فيه ملايين أفلسوا بسبب هذه الخطوة.. فانتبوا….

مي محمد ✍️✍️✍️