طفل اتولد بهيئة بتساوي الـ 80 سنة!
الصورة اللي قدامك دي لطفل حديث الولادة، عمره ساعات بس، لكن وشه وجسمه ما بين الـ 70 والـ 80 سنة..
ودي حالة نادرة بتحصل حسب أحصائيات العلماء من بين كل 4 ملايين طفل، بيصاب بيها طفل واحد!
وهي لطفل حقيقي أتولد في محافظة «ماجورا» في «بنغلاديش».
بيعاني من تجاعيد في الوجه، وأعراض شيخوخة مُبكرة، شعرة خفيف كأنه مصاب بالصلع اللي بيظهر من ضمن أعراض الشيخوخة، كمان عنده شعر كثيف على ضهرة!
العلماء قالوا مفيش علاج للظاهرة دي، لأن كل اللي بيعرفوه إن هي حالة وراثية نادرة نتجت عن خلل في جين مُعين، بيخلي البروتين داخل الجسم غير طبيعي.. ودي الأعراض اللي بتحصل مع تقدم العمر أو الشيخوخة المبكرة!
أهل الطفل متمسكين بيه، وعندهم آمل أنهم يلاقوا علاج يعدل الخلل الجيني، والبروتين غير المستقر.. وإنه يعيش كأي طفل عادي، لكن العلماء أكدوا أن أقصى حالة عاشت مصابة بنفس الخلل الچيني والاضطراب ده متخطتش حاجز الـ 13 سنة.
وده لأن الإنسان الطبيعي لما بيتولد بتكون الچينات والبروتينات حديثة وفي أحسن حالاتها، لكن كل ما الإنسان تقدم في العمر قلت جودتها الطبيعية، ويبدأ بشكل تدريجي يدخل في مرحلة الشيخوخة.
العلاج الوحيد ليه إن العلماء يلاقوا حل لفكرة تقدم العمر الچيني نفسه.. عن طريق “تقنيات التعديل الچيني” لكنها أشبه بالأحلام، لأنهم بيتمنوا إن الإنسان يعيش لأطول فترة ممكنة بتأخير أعراض الشيخوخة دي، فلو لقى الإنسان علاج لأعراض الشيخوخة، ممكن يقدر يعالج حالات زي الطفل ده!
المهم مُتخيل إن خلل چيني بسيط غيّر الإنسان للحالة دي؟
سبحان الله، الذي خلقنا في أحسن تقويم.
عايزة أعرف إيه رأيك في الحالة النادرة دي؟
سمعتوا عن حالة زيها قبل كده؟
مي محمد ✍️✍️✍️