سيجورد ايستينسون

بصوا احنا سمعنا قبل كده قصص كثيره وعجيبه عن اغرب اسباب الموت و قصص الانتقام وخصوصا لو اللي اتقتل ده مات مظلوم
النهارده هحكيلكم عن واحده من اغرب قصص الانتقام دى وهي بتعتبر موته غريبه ومضحكه في نفس الوقت

زمان في القرن الــ 9 الميلادي ايام الفايكينج كان معروف عنهم طبعا وقتها انهم مقاتلين اقوياء بيتنقلو بسفنهم من بلد للتانية عشان يغزوها وينهبو ثراوتها
كان واحد من زعماء الفايكنج دول اللي هو بطل قصتنا اسمه (سيجورد ايستينسون)، حكم ف الفترة اللى مابين (875 و 892 م) كان مشهور وليه حملات وغزوات كتيرة ومعروفة،، بس شهرته مقتصرتش على غزواته وبس لا دى كمان اشتملت الطريقة اللى مات بيها… ازاى بقى!؟

بص ي سيدى سيجورد ده كان ليه عدواه مع حاكم اسكتلندى اسمه (مابيل بريغت)، ف جه فى يوم واتحداه لمبارزة اسمها (منازلة الاربعون رجل) وده نوع من المبارزات الجماعيه كان شائع جدا في وقتها بحيث ان كل طرف يجيب معاه 40 فارس بس ويتقاتلو واللى يخسر يدى اللى يفوز كل حاجه بيملكها.

ف مابيل وافق على النزال ده وفعلا حضر ومعاه 40 فارس بس، بس سيجورد بقى كان مكار وغدر بيه وجاب معاه على كل حصان رجلين عشان يبقى عددهم 80 بدل اربعين، والحاكم مابيل عرف خططته وكشفها بس قال لاتراجع ولا استسلام وعليا وعلى اعدائى وبدأو المبارزة وبما اننا عارفين ان الكثرة بتغلب الشجاعة فـ سيجورد هو اللى فاز بالنزال ده ومابيل وقع قتيل، هل سيجورد يسكت على كده🤔 لا ابدا ازاى عشان يشفى غليله منه قام قطع راسه وعلقه على سرج حصانه ومشى يتمختر ويقول يا أرض اتهدى ما عليكى قدى

هل القصة خلصت على كده لا والله ابدا…

الظاهر ان مابيل ده زعل على موته وقرر انه ينتقم لنفسه حتى وهو ميت ازاى ده🤔

اقولك وسيجورد ي سيدى ماشى بيتمختر بحصانه كده زى م قولنا ومعلق الراس على السرج ، كان مابيل اسنانه كبيره جدا زى اسنان الارنب وبسبب هزات الحصان للراس تقوم الاسنان دى داخلة ف رجل سيجورد وتجرحه والجرح بسرعه اتلوث واتسمم عشان يموت سيجورد على آثره بعدها بيومين بس

انت متخيل ازاي ان راس مقطوعه تقتل رجل حي!!
ياترى كانت مصادفه ولا كانت عقاب لمكر وخداع سيجورد وانتقام رجل مظلوم…؟!

مي محمد ✍️✍️✍️