للمرة الرابعة هنشوف رئيس أمريكي سابق، بيسلم نفسه للشرطة، وطبعا التلات مرات السابقين كانوا لنفس الرئيس السابق، دونالد ترامب!
هيدخل ترامب من جديد لسجن مقاطعة فولتون فى اتلانتا، في محاكمته هو و 18 متهم تانيين فى قضية التآمر لتغيير نتيجة الانتخابات فى ولاية جورجيا..
غالبا هيخضع ترامب للتفتيش، وبعدين هتتاخد بصماته، وهيتم تصويره صورة السجن الشهيرة بالرقم، وبعدين هيتوجه محاميه لدفع الكفالة المخصصة لإطلاق سراحه على ذمة القضية، وهي 200 ألف دولار..
هيكون ترامب ملتزم بعدم استخدام وسائل التواصل الاجتماعي، لمهاجمة المسئولين عن القضايا، ولا المدعية العامة للولاية، ولا حاكم الولاية، ولا إنه يتواصل بأي شكل مع المتهمين الـ 18 معاه فى القضية، ولو خالف التعليمات دي فهيتم مصادرة الكفالة وسجنه على ذمة القضية..
احنا على بعد سنة و3 شهور من الانتخابات الأمريكية، الانتخابات اللى للمفاجأة أقرب المرشحين إنه يكسبها هو “دونالد ترامب” اللى مكتسح كل استطلاعات الرأي..
لكن خلال السنة و3 شهور دول هنشوف على الأقل 4 محاكمات متزامنة فى 4 ولايات مختلفة، وهنلاقي ترامب طالع من ميامي رايح نيويورك ومن جورجيا لواشنطن.. علشان يحضر جلسات محاكمته..
غير إنه ممكن فى خلال الفترة دى، تصدر عليه أحكام قاسية، فالاتهامات الموجهة ليه مش قليلة أبدا، بل هي من أكبر الاتهامات اللى ممكن توجه لحد فى الولايات المتحدة بعد جرائم القتل..
العالم إذن على موعد مع مشاهدة هذا الحدث الاستثنائي المستمر للشهور القادمة.. وربما نشوف مصير قاسي ونهاية صعبة لترامب..
مي محمد ✍️✍️✍️