واحدة من القصص المؤثرة في حياتي هي قصة حياة الوليد بن طلال رجل الأعمال والأمير السعودي، وإزاي بدأ حياته وهو متعثر جدا، ووالده الأمير طلال بن عبد العزيز قدمله مبلغ مالي بسيط أسس بيه شركته الأولى سماها “المملكة”، وانطلق بصورة بسيطة جدا في عالم ريادة الأعمال، شركته كانت عبارة عن شقة من 4 غرف، واحدة ليه، وواحدة للسكرتيرة، وواحدة للمدير، والرابعة مطبخ، وبعدها خسر فلوسه كلها تقريبا واضطر يقترض من سيتى بنك مبلغ مليون ريال سعودي، وتمر الأيام وينطلق الوليد بن طلال ويصبح أهم مستثمر في الولايات المتحدة الأمريكية، ويتعرض سيتي بنك للإفلاس ويتدخل الوليد ويشتريه وينقذ البنك اللى أقرضه في بداية حياته من الإفلاس.
ممكن الواحد يقرأ كتب كتير، أو يسمع حكايات، أو يشوف أفلام، أو حتى يقرأ قصائد شعر، لكن قليل منها اللى هيسيب أثر فيك ويخليك تعيد نظرتك لأى مسار إنت واخده في حياتك، علشان كده أنا بعتبر كتاب “الوليد” اللي بيعرض السيرة الذاتية للوليد بن طلال، من القراءات المهمة اللي خلتني أبص لحياتي العملية بشكل مختلف ويكون عندي استراتيجية واضحة في التخطيط لأى شغل أفكر أعمله.
عجبنى جدا إن الراجل كان نفسه طويل في الحياة العملية وكان له مبدأ في البيزنس لطيف جدا: “الشراء عند السعر المنخفض ثم الانتظار” يعنى متضيعش الفرصة من ايدك إمسك فيها بأى طريقة وبكرة هتكسب من وراها، ومن الحاجات المهمة في الكتاب اللى بنصح الشباب إنهم يقرأوه، إن الوليد بن طلال كتب يومه فى العمل بيمشى ازاى، بيبتدى الساعة 12 ظهرا ولا ينتهى إلا مع الساعات الأولى من الصباح، فلو حسبتها هتلاقيه بيشتغل لأكثر من 15 ساعة في اليوم، يعنى ببساطة لو عايز تنجح وتستمر في نجاحك حتى لو كنت أمير اوعي تبطل تشتغل …. بل اشتغل أكتر 👌
مي محمد ✍️✍️✍️