انتشرت صور مختلفة خلال الأيام اللي فاتت لجسم معدني قديم وضخم لونه أخضر موجود على ناصية شارع 213 في حي المعادي في محافظة القاهرة، وعليه جملة “تليفون بوليس”!.. رغم إنه موجود من مدة كبيرة بس فيه أكتر من حد صوره ونشر صورته مع أسئلة متعلقة بإيه هو الجسم ده وإيه استخدامه وتاريخه. .
جهاز “تليفون بوليس” بيرجع تاريخه لعهد الخديوي إسماعيل قبل اختراع اللا سلكي، وتم استيراده من أوروبا وكان منتشر في كل الشوارع والميادين، وهو عبارة عن صندوق مقفول بمفتاح وجواه تليفون متوصل بشكل مباشر بتليفون أمين القسم.. الجهاز ده كان هو وسيلة التواصل الوحيدة بين رجال الأمن وبين أقرب قسم شرطة في حالة الحاجة لدعم أمني..
بالمناسبة.. ده مش الجهاز الوحيد اللي جه مصر زمان من أوروبا.. كمان في عهد الخديوي إسماعيل تم استيراد جهاز “البارومتر” اللي بيقيس ضغط الغاز في الهواء، وجهاز التلغراف، وخزائن الأموال المتصلة بماسورة متصلة بخزينة البنك واللي كان بيقدر الشخص يحط فيها فلوسه في ظرف عليه اسمه وتاني يوم موظفين البنك يحطوها في حسابه وهي دي فكرة ماكينات الـ atm في بدايتها أساساً!..
مي محمد ✍️✍️✍️