تعرف إن نص الياسمين اللى بيتباع فى محلات الزهور فى العالم كله، والياسمين اللى بيستخدم فى صناعة العطور العالمية، زي شانيل، ومس ديور، وأوبيوم، كل ده بيطلع من عندنا فى مصر؟ وتحديدا من قرية “شبرا بلولة” فى محافظه الغربية..

تعرف إن نص الياسمين اللى بيتباع فى محلات الزهور فى العالم كله، والياسمين اللى بيستخدم فى صناعة العطور العالمية، زي شانيل، ومس ديور، وأوبيوم، كل ده بيطلع من عندنا فى مصر؟ وتحديدا من قرية “شبرا بلولة” فى محافظه الغربية..
الحكاية بدأت لما واحد من أهالي القرية، قالهم تعالوا نزرع ياسمين! واقترح الفكرة دي عليهم، وتواصل مع ناس برة مصر علشان ياخدوا الياسمين اللى بيزرعه في مصانع العطور العالمية..
ووصلنا النهاردة إن من “شبرا بلولة” بقى بيتصدر حوالي 2500 طن من أزهار الياسمين سنويا، وده حوالي 60% من حجم الإنتاج فى العالم، لدرجة إن فيه سمعة عالمية إن ده ياسمين ممتاز، ده “ياسمين شبرا بلولة”..
المساحة المزروعة من ياسمين شبرا بلولة بتوصل لحوالي 257 فدان، ودي أغلب مساحة القرية..
ورغم أن القرية فى مكان بعيد ومعزول عن الطرق الرئيسية لكن القرية بيجيلها زوار من كل أنحاء مصر، علشان يشاركوا مع الأهالي فى عملية قطف الياسمين..
عملية قطف الياسمين بيشترك فيها كل أهالي القرية، حتى الأطفال الصغيرين، اللى بيقطفوا الياسمين ساعتين قبل ما يروحوا المدرسة.
كيلو الياسمين سعره بيوصل تمنه لحوالي 4.5 جنيه استرليني، يعني حوالي 180 جنيه، والرزق اللى جاي منه بيخلي سكان القرية مستورين وحالهم كويس والحمد لله..

أجمل ما فى القرية، عملية إنتاج الياسمين المنظمة، من تحويل الزهور لعجينة، ثم تحويل العجينة لزيوت، وابتكار طرق جديدة تخلي عملية الإنتاج دي بجودة أعلى تقدر تنافس أي إنتاج تاني فى العالم.
شبرا بلولة قصة مصرية جميلة، ومدهشة، ازاي قصة نجاح عالمية بتبتدي مجرد فكرة صغيرة..
مي محمد ✍️✍️✍️