تخيل معايا كده انك قاعد في سوق واذ فجاه دخل عليك راجل شيك كده ماسك حبل مربوط فيه واحده ست ماشيه وراه وجه الراجل ده وقف وسط السوق وبدا يضخم صوته وينادي ويقول مين يشتري من يزايد ست جميله وكتومه ومدبره مين هيدفع اكثر؟!
بعدها الرجاله اللي في السوق يتجمعوا حواليه ويقعدوا يفحصوا ويمحصوا في الست اللي معاه دي، واحد يقول انا هاخدها بـ3 شلنات، الثاني يقول عليا انا باربعه، البائع يبصله كده ويقوله اربعه؟ يا راجل دي ست جميله خالص بتدفع فيها اربعه بس ! يقوم واحد طالع ويقول هاخذها بخمس شلنات
البائع يعني خلاص كده محدش هيزود؟ وبعدين يبص للست اللي معاه يقولها موافقه ي هانم على الراجل ده؟ هيا تهز راسها بالموافقه و الف مبروك عليك المزاد يابيه.
اكيد انت دلوقتي قاعد بتتخيل الموقف ومستغرب اوي ويمكن كمان قاعد بتضحك في نفسك وبتقول هههه هو ده مشهد فى سوق النخاسة في ايام قريش ولا ايه
لا يا فندم الموقف ده مش اكثر من مشهد في احد اسواق انجلترا قبل 150 سنه، والراجل اللي كان بيزايد على الست دي ماكنش بيبيع اي ست عاديه كده لا ده كان بيبيع مراته مقابل خمس شلنات متخيل !!
ما بين اواخر القرن ال 18 ومنتصف القرن ال 19 انجلترا عاشت في وسط الظاهره الغريبه من نوعها دي وهي بيع الزوجات ، يعني كان من الطبيعي جدا وقتها انك وانت قاعد الصبح كده تقرأ الجرنان تلاقي خبر قدامك بإعلان لشخص بيبيع مراته في مزاد علنى
طيب هما كانوا بيعملوا كده ليه كان تخلف يعني ولا ايه بالضبط؟!
بصي يا سيدي قبل سنه 1857 انجلترا كانت مفتقره للقوانين اللي بتضبط شروط الطلاق وعشان يبطلوا الزواج اضطر الانجليز انهم ياخذوا موافقه البرلمان وتأييد الكنيسه وبسبب ضرورة طرح المسأله دي قدام السلطات العليا فكانت تكاليف الطلاق غاليه جدا واستقرت في اغلب الاحيان عند مبلغ 3000 جنيه كده
ومع التكاليف الغاليه دي كانوا الناس الاغنياء بس هما اللي قادرين يطلقوا زوجاتهم في الوقت اللي هما عايزينه، وفي ناحية ثانيه افراد الطبقات المتوسطه والفقيره لجأوا لحلول ثانيه عشان يحطوا حد لحياتهم الزوجيه التعيسة.
ولانهم مكانش بمقدورهم انهم يتجوزوا ثاني قبل ما يطلقوا الزوجه الاولانيه بسبب ان القانون الانجليزي كان بيحرم فكره تعدد الزوجات فكان الزوجين اللي من الطبقه المتوسطه والفقيره اللي كانت العشره تكاد شبه منعدمة ما بينهم ومش طايقين بعض اطلاقا اتجهوا لعمليات البيع في المزاد العلني وكان بيكون احيانا برضا الزوجه ، وخصوصا الزوجه اللي كان ليها عشيق على جوزها فكان الموضوع ده زي الفل على قلبها يا باشا وكانوا بيتفقوا على سعر رمزى ميتعداش الجنيه الواحد.
والظاهره دي انتشرت بسرعه البرق في المناطق الانجليزيه الفقيره، وبحسب كتير من المصادر التاريخية شهدت إنجلترا ما بين عامي 1780 و1850 أكثر من 300 مزاد لبيع الزوجات !
طيب هتقول وكان فين دور السلطات قدام الحاجات اللي غير قانونيه دي؟
هقولك يا سيدي ان السلطات الانجليزيه اتغاضت قصدا عن الموضوع ده لانهم كانوا بيعتبروا عمليه البيع دي ما هي الا طلاق رمزي لإنهاء المشاكل الزوجيه.
وفي بدايه سنه 1857 عمليات بيع الزوجات دي بدات تختفي بشكل تدريجي بعد ما ظهر قانون البرلمان الانجليزي اللي سهل على الكل اجراءات الطلاق وخلاها في متناول الجميع عشان تختفى العادة الغريبه دي في مطلع القرن الــ20
مي محمد ✍️✍️✍️