النظارات قديما

كل يوم وبمرور الوقت والايام ضعف النظر بيزيد بمعدل كبير جدا والعلماء متوقعين ان بحلول سنه 2050 هيبقى معدل المصابين بضعف النظر اكثر من 4.7 مليار شخص يعني تقريبا حوالي نص سكان العالم، ومعروفه ان حل المشكله دي والطريقه الاكثر امان هي النظارات الطبيه؛ بس فكرت قبل كده ايه كان حال الناس اللي عندهم ضعف نظر قبل اختراع النظاره او كانوا بيتعاملوا ازاي من غيرها؟!

قالك يا سيدي ان البشر قديما قبل اختراع النظاره كانوا بيتأقلموا مع مشاكل البصر لانهم طبعا مكانش عندهم سيارات ومكنش مفروض عليهم ان هم يشوفوا الاشارات وماكانش عندهم نت زي حالنا دلوقتي، يعني ببساطه كانت اكثر وظائفهم ما بتعتمدش على حاسه النظر.

والناس بقى اللي كان بيجيلهم ضعف نظر كانوا بيحاولوا انهم يوظفوا نفسهم في حاجه معينه زي مثلا المؤرخين الشفويين او الموسيقيين او انهم يرووا قصص ف مكانوش بقى بيمارسوا المهن اللي بتعتمد على الرؤيه زي الصيد وغيرها وكمان القراءه مكانتش منتشره قبل سنه 1700 لان الكتب كانت مصنوعه بالايد ف وقتها وكانت نادره جدا وكانت كمان بيقراها اشخاص محددين بعيد عن عامة الشعب حتى بعد اختراع الطباعه كان لسه وجودها نادر للاشخاص العاديين.

كانت اكبر مشكله بتواجههم هي انهم مكانوش بيقدروا يدافعوا عن نفسهم من هجوم الحيوانات المفترسه وكل لما كانوا بيتحطوا في موقف زي ده بيكونوا في وقتها في وضع لا يحسد عليه، وكل ما زادت مشاكل البصر عندهم زادت المشكلات اللي بيواجهوها والمخاطر اللي بيتعرضوا ليها

بس في نهايه القرن الـ 13 الامور اتغيرت لما العلماء بداوا يبحثوا عن علاج للمشاكل البصريه واخترعوا في الوقت ده اول نظاره طبيه في شمال ايطاليا، وواحد اسمه (نيل هاندلي امين متحف كليه البصريات في لندن) قال ان المنطقه دي كانت مركز لانتاج الزجاج وبسرعه نقلوها التجار على طول طريق الحرير وصولا لـ آسيا.

وكانت النظارات في الوقت ده زي ما انت شايف ف الصوره كده من غير ذراعات فكانت بتثبت فوق الانف او كانوا بيربطوها برباط ويلفوها حوالين راسهم

ومع الوقت اتطورت واحدة واحدة لغاية لما وصلت لشكلها الحالى واكتسبت اشكال كتيرة ومتنوعه.

مي محمد ✍️✍️✍️