الفيس بوك مليان بوستات ان الوقت ده جيد لعمل مشروع خاص
ناس اسلوبها حلو في الكتابه و بتدي نصايح للناس ان الدنيا مهما كانت صعبه لكن عادي ممكن تعمل مشروع و تنجح و القرش يجري في ايدك
من اغرب البوستات واحد منزل مجموعه مشروعات للشباب ، مع كلام طويل عريض ان فرصه نجاح المشروعات دي كبيرة اوي .
من ضمن المشروعات ان الشاب يعمل محل او يشتغل في مجال الملابس ، او التليفونات المحموله
النصيحه امانه و عشان تعطي نصيحه لازم تكون رجليك على الارض ، شايف الواقع و بخبرتك تتوقع القادم عشان نسبه نجاح نصيحتك تكون عاليه
نصيحه اعمل محل ملابس … لو تعبت شويه هتكتشف ان اغلب المحلات المعروضه للايجار حاليا كان اخر نشاط اتعمل فيها هو الملابس ، للاسف كم محلات الملابس التي اغلقت كبير جدا …. الاسباب معروفه لان السوق متشبع في هذا القطاع ، اسعار الملابس ارتفعت جدا ، منافسه شرسه ، ضعف في القوي الشرائية في مجال الملابس ، ارتفاع الايجارات و الكهرباء و العماله و الضرايب للمحلات ….. النتيجه ان سوق تجارة الملابس بيتفلتر
نفس الكلام ده على محلات التليفونات المحموله لكن ضيف عليهم صعوبه الاستيراد و نقص للبضاعه …. النتيجه ان عتاوله في تجارة التليفون المحمول خرجوا او انكمشوا في السوق .
انا بكتب ده مش عشان احبط الشباب ، بالعكس انا بنورهم .
مش اي نصيحه في مجال البيزنس تتحمس ليها بدون ما تدرسها على الارض ، شوف السلبيات قبل الايجابيات ، ادرس بنفسك المشروع من كل الجوانب ، اسال ناس في نفس المجال .
اخيرا لما حد يعملك البحر طحينه ، لازم تقلق و تدور بنفسك و تتعلم العوم عشان متغرقش لما تعرف ان البحر مش طحينه لكن البحر التيار فيه عالي و ممكن يغرقك .
مي محمد ✍️✍️✍️