الثوره الصناعيه هي واحده من الأحداث اللي غيرت بيئة كوكبنا للأسوأ ، الثوره الصناعيه بدأت في القرن 18 و 19 في انجلترا و بعد كده انتقلت لأوروبا و العالم ، وكان الإختراع اللي تسبب في الثوره الصناعيه هو الآله البخاريه اللي اخترعها صاحبنا جيمس وات و اللي كانت الثوره أصلا نتيجه لثوره سبقتها وهي الثوره الزراعيه اللي أدت لأن الفلاحين يكونوا سوق مناسب للآلات و يستخدموها في الزراعه و بالتالي إنتاج محاصيل كتيره جدا بأيدي عامله قليله و سعر رخيص.
طيب هل الثوره الصناعيه شئ جميل وخير على الجميع ؟ أحب أقولك لا ، الثوره الصناعيه كانت مُحتكره من قبل دول قامت فيها الثوره دي زي بريطانيا و أوروبا الغربيه و الولايات المتحده و اليابان و الثوره الصناعيه كانت الأساس اللي قامت عليه الدول القويه اقتصاديا دي و أدت الثوره الصناعيه لدمار اجتماعي كبير ، الثوره بالبلدي كده قالت للعامل مش محتاجاك و كنتيجه انتشرت البطاله و الفقر و الإضراب عن العمل و الثورات العماليه و أدت أيضا لظهور أُدباء زي تشارلز ديكنز و رائعته أوليفر تويست و ظهور كارل ماركس و إنجلز وحركات عماليه تهدف للدفاع عن حقوق العمال و أدت لثورات كتير منهم المؤقته ومنهم الثوره الكبرى البلشفيه.
طب الثوره عملت ايه في كوكبنا ؟
الثوره الصناعيه أدت لظهور الطريق المزدحم بالسيارات الصبح عشان الكل يلحق يروح شغله و السلبي هنا هو العوادم بتاعت السيارات اللي بتسبب الاختناق في الزحمه دي و بتخلي ان المدينه الصناعيه الكبيره دي مكان غير مناسب للعيش فيه و زيادة الهجره بشكل مخيف من الريف للمدينه أدى لانتشار الأمراض زي الكوليرا و التيفود تعال نشوف واحده من أخطر نواتج الثوره دي:
The Great Smog of 1952
سكان لندن في يوم 5 ديسمبر 1952 بيصحوا من النوم على ضباب وجو بارد فيقوم الشخص الإنجليزي الجميل ويجيب الفحم عشان يواجه البرد ده وكل اللندنيين استخدموا كمية فحم مبالغ فيها علاوة على المصانع أدت لحدوث تلاقي بين كتل الهواء البارد وكتل الهواء الساخن و أيضا الكبريت اللي موجود في الفحم ردئ الجوده ده فشكل كارثه صعبه جدا على البشريه ، الدخان و الضباب عملوا ميكس مع بعض و جعلوا الرؤيه مستحيله بحيث اللي يكون ماشي ميشوفش رجليه ، كل حاجه في لندن اتعطلت و انتشار عمليات السرقه وكانت فوضى استمرت لمدة 4 أيام جت رياح شرقيه أزالت السحابه الحزينه دي على لندن ، ولكن الأضرار ظهرت و إحصائيات موت 8000 شخص على إثر الضبخان القاتل ده و يقال 12000 متأثرين بالهواء اللي تنفسوه في الفتره دي ، وأدت الكارثه دي لسن قوانين في المجتمع البريطاني للحفاظ على البيئه.
و أيضا كارثة الأمطار الحمضيه في بنسلفانيا كانت درجة ph للمطر 5.6 .
تعال للحروب و النزاعات اللي تسببت في خسائر للأرواح و الممتلكات ، الحرب العالميه الأولى 40 مليون جندي و مدني و الحرب العالميه الثانيه اللي تسببت في مقتل 70-80 مليون شخص ، ونروح للطريقه الأمريكيه القذره اللي تم تبريرها انها دفاع عن النفس واستخدام أول قنبلتين ذرييتين في قصف هيروشيما و ناجازاكي اللي تسبب في مقتل 200 ألف شخص بشكل مباشر و موت الآلاف الآخرين من نواتج الإشعاع و شيوع السرطان بسبب الجريمه دي واللي لسه الجاني فيها لم يحاسب.
كوكبنا بيصرخ أيضا بسبب التجارب النوويه في جزر المحيط الهادي ، بين 1946 – 1958 أجرت الولايات المتحده 67 تجربه نوويه في جزر مختلفه ، في جزر مارشال ذات الطبيعه الخلابه و البيئه الجميله جدا اختارتها أمريكا في سنة 1958 انها تختبر القنبله (cactus) اللي عملت حفره عميقه في الأرض لحد انهارده و الأمريكان اكتفوا انهم يغطوها بأسمنت من فوق ولكن سابوا أسفل الحفره بدون تغطيه وبالتالي المخاوف تتزايد من تسرب النفايات النوويه لمياه الجزر ، وفيه كمان حاليا تصدعات في هذه القبه ، وزيادة الاستغاثات من جانب مسؤولي الجزر للأمم المتحده اللي بيقولوا ان القبه ملوثه بالكامل بالبلوتونيوم 239 المسمم بشده.
مي محمد ✍️✍️✍️