العالم كله دلوقتي في انتظار أنطلاق اكبر سفينه في التاريخ من عظمتها سموها معجزه البحار وهي سفينة “icon of the seas ” اللي هتخرج من البحر الكاريبي في يناير ٢٠٢٤ وعلي ضهرها ٨٠٠٠ شخص من أغنياء الكوكب وهيكون فيها أكبر حديقة مائية في العالم كله وقبل مااحكيلك عن السفينة نفسها لازم تعرف الأول حجم السفن بيتقاس ازاي ..
• حجم السفينة بيتقاس بوحدة قياس اسمها gt ودي أختصار لمصطلح “gross tonnage” اللي معناه الحمولة الاجمالية القابلة للأستخدام في السفينة وبتتقاس بالطن ..
عندك مثلا سفينة تايتنك لما اتصممت عام ١٩١٢ حجمها كان بيزيد عن ٤٦ الف طن وفي سنه ١٩٩٦ البشر قدروا يبنوا سفينة اسمها ” destiny class” حجمها كان بيزيد عن ١٠٠ الف طن يعني ضعف سفينة تايتانك وفي ٢٠٢٢ قدروا يبنوا سفينة اسمها ” wonder of the seas” حجمها بيزيد عن ٢٣٦ الف طن يعني اكتر ٥ مرات من تايتانك والسفينة دي كانت اكبر سفينة في التاريخ لحد مالخطوط البحرية ” royal Caribbean international ” اعلنت عن السفينة الجديده” icon of the seas” ..
• السفينة من تصنيع شركة “meyer turku” الفنلنديه وهتكون جاهزه للأبحار اول سنه ٢٠٢٤ وحجمها او حمولتها الإجمالية هتوصل ل ٢٥٠,٨٠٠ طن وقدرت فعلًا الشركة المصنعة تجربها في مياه مفتوحة ونجحت في التجربة .
• السفينة بتشتغل بالغاز الطبيعي المسال وتكنولوجيا تانيه اسمها خلايا الوقود حاجه كده شبه البطاريات بتشتغل بالهيدروجين والأكسجين وبتقدر تنتج منهم كهربا .
وعشان تتخيل حجم السفينة تعالوا نقارن مابينها وبين تايتانك اللي كلنا عارفنها ..
سفينة تايتانك كان عندها قدرة استيعابية بتشيل ٢٢٤٠ راكب بما فيهم طقم السفينة لكن السفينة الجديدة الطقم بتاعها لوحده بيوصل ٢٣٥٠ فرد يعني اكتر من اللي كانوا علي ضهر تايتانك وهتستوعب معاهم كمان ٥٦١٠ راكب يعني بتشيل حوالي ٨٠٠٠ شخص .
تيتانك كانت مصممه انها تشتغل بالفحم اللي بيتحرق ويسخن المياه وبعدين تتحول لبخار والبخار يحرك محركات السفينة لكن السفينة الجديدة بتشتغل بالغاز المسال .
السفينتين سرعتهم متساوية تقريبًا بتوصل ل ٤٢ كيلو متر في الساعة برغم ان السفينة الجديدة حمولتها اكتر من تايتانك ٥ مرات وده يوضحلك قوه محركها .
سفينة تايتانك كانت بتتكون من ١٠ طوابق فيهم ٨٤٠ غرفة متوزعين بدرجات مختلفة علي ادوار السفينة في المقابل السفينة الجديدة بتتكون من ٢٠ طابق فيهم ٤ فئات مختلفه من الغرف بيوصل عددهم ل ٢٨٠٥ غرفة ،اول فئه من الغرف هي ال suits او الاجنحة فيهم ١٣ درجة مختلفه بمساحات بتوصل ل ١٦٥ متر وبلكونات بمساحات واسعة جدا شايفه البحر بصورة بانورامية تقدر تعتبرها فيلات متكاملة علي السفينة سكانها ليهم حي مخصوص ممنوع حد غيرهم يدخله ومتوفرلهم فيه ارقي الخدمات ووسائل الترفية ،تاني فئه هي ال balcony واللي بتتكون من ٨ درجات مختلفه والنوع ده مساحاته اصغر من الاجنحة مساحته بتوصل ل ٢٦ متر وفيها بلكونات بمساحات معقولة منها اللي واخد فيو علي البحر ومنها علي الحدائق الداخلية ،والفئة التالته هي ocean view ودي بقي فيها درجتين ومساحتها قريبة من الفئة اللي قبلها لكن الفرق ان مفيش اي بلكونات وفيها شباك واسع شايف البحر ،والفئه الاخيره هي ال inside او الغرف الداخلية بتتقسم ل ٥ درجات ومساحتها قريبه من الفئتين اللي قبلها لكن ما فيهاش بلكونه او شباك وكل الحوائط اللي فيها مقفولة .
طب ياتري سفينة بالمواصفات دي أسعار الرحلات عليها ممكن توصل لكام وايه اللي بيحصل فيها ..
• اول رحله متاحة هتكون رحله سياحية مدتها ٧ ليالي هتزور فيها مجموعه جزر في بحر الكاريبي .
• الغرف في الفئه الأخيرة بيوصل سعرها ل ٣٦٠٠ دولار للفرد والفئه التالته ل ٣٧٠٠ دولار والفئه التانيه ٤٩٠٠ دولار ولومستني تعرف سعر الاجنحة فدي سعرها بيوصل ل ١٩٠٠٠ دولار للفرد الواحد .
والشركه اللي بتمتلك السفينة اعلنت ان بالأماكن الترفيهية اللي عليها هتكسر ارقام قياسية في عالم السفن لأن تيتانيك اللي البشر اعتبروها افخم سفينة في التاريخ الأماكن الترفيهية اللي علي ضهرها كانت عباره عن جيم وحمام سباحة وملعب اسكواش ومطعم لكن في سفينة icon of the seas موجود ٧ حمامات سباحة اكبر واحد فيهم اسمه royel bay وده اكبر حمام سباحه في تاريخ السفن بيستوعب ٤٠ الف جالون من المياه ويعتبر واحه متكاملة علي ضهر السفينة ومتصمم علي مستويات مختلفة بأفكار مبهرة .
ده غير مكان اسمه the hide away اللي يعتبر شط صناعي علي السفينة بيضم لوحده ٤ حمامات سباحه من ال ٧افخم واحد فيهم هو hide away pool وده عباره عن حمام سباحة infinite الرؤية فيه مفتوحة تمامًا وبيقابل خط الأفق مع السما زي البحر بالظبط وعلي حسب كلام الشركة هتحسسك انك علي شواطئ mykonos في اليونان .
السفينة عليها كمان اكبر حديقة مائية عائمة في التاريخ فيها ٦ زحاليق مائية او water slides منهم واحده كسرت الرقم القياسي كأكبر water slides علي ضهر سفينة في التاريخ .
ده غير ان السفينة عليها قبه اسمها aquadome مخصصه للعروض المائية المسائية ،وبدل المطعم هيكون فيها ٢٠ مطعم متوزعين في الحديقة المركزية وفي الأماكن الترفيهية وحمامات السباحة بيقدموا اكلات مختلفه من كل مكان في العالم ….
مي محمد ✍️✍️✍️