“آخرها غرق شقتها” الأزمات تلاحق نورهان.. ما علاقة أمريكا واليونان؟..

كشفت الفنانة نورهان شعيب، تعرض شقتها للغرق، لافتة إلى أنها تعرضت للتلف بالكامل.
وكتبت نورهان، عبر حسابها الرسمي على “فيسبوك”: “إمبارح رجعت من بره بافتح الباب سمعت صوت مية مفتوحة بافتح باب الحمام لقيت المية مغرقة الأرض ودواليب الحمام والأدراج والهدوم والفوط والعلاج وعلب الأدوية اللي شارياها من أمريكا بكميات عشان مفيش منها في مصر كله راح خساير بالجملة”.

وأوضحت نورهان، أنها اكتشفت أن هناك تلفًا في مواسير المياه: “اكتشفت أن فيه ماسورتين اتكسروا وخرجوا من مكانهم والدنيا غرقانة والمية طالعة بره الحمام ومغرقة نص أوضة النوم وتحت السرير”.

وأضافت، نورهان: “وقفت مذهولة كدة 5 دقايق وكلمت السباك وأنا بأفكر إني لو كنت اتأخرت ساعة واحدة بس بره! زي ما بأعمل كل يوم بعد الشغل بأفضل قاعدة بالساعة، والساعتين أحيانًا عشان أحضر شغل اليوم اللي بعده، كان زمان بيتي كله بالكنب والسجاجيد، وكل شئ ضاع”.

وتابعت: “لطف بيا الله فيما جرت به المقادير زى ما دايما باطلب منه، قد ايه بينجينا المنجي من كوارث وإحنا قاب قوسين أو أدنى منها، لولا رجوعي في الوقت المناسب كان حجم الخساير تضاعف أضعافا مضاعفة، الحمدلله على كل شئ”.

وقالت نورهان “على مدار السنة الحالية دي، حدث أكثر من أزمة بشقتي، لما رجعت من سفرية أمريكا الخامسة والأخيرة لقيت النجفة بتاعت الكوريدور واقعة والإزاز متكسر ومتنتور على الأرض في كل حتة، ولما رجعت من سفرية اليونان، اللي كانت 3 أيام بالعدد، لقيت دولاب المطبخ اللي متعلق عالحيط وقع وكل الصيني والإزاز مرمي على الأرض متكسر”.